Алматылық құтқарушылар қаза тапқан польшалық туристің мүрдесін алып шықты

28 Января 2016 1600 Турист, Құтқарушылар

Алматы. 28 қаңтар. Ақпараттар орталығы. Алматы құтқарушылары қаза тапқан польшалық туристің мүрдесін алып шықты. 2016 жылдың 28 қаңтарында сағат 04:40-та оның мүрдесі Талғар АІІБ қызметкерлеріне берілді, деп хабарлады Алматы қаласы ТЖ департаментінің баспасөз қызметінен.

Хабарда айтылғандай, ауа райының қолайсыздығы және тікұшақты қолдану мүмкін болмағандықтан, польшалық туристің мүрдесін жаяу алып түсу туралы шешім қабылданған болатын.
«Ауа райының қолайсыздығын және марқұмның туыстарының өтінішін ескере келе марқұмның мүрдесін жаяу алып түсу туралы шешім қабылданды», — делінген хабарда.
Хабарда айтылғандай, ҚР ІІМ Төтенше жағдайлар комитеті Республикалық жедел-құтқару жасағының қызметкерлері таудан түсетін жолын белгіледі. Соған сәйкес, құтқарушылар Бутаков асуы (2870 м), Пионер (3011 м) шыңы және Лесной (2400 м) асуы арқылы жүріп отырып, Бутаков шатқалына түсуі керек болды.
Сондай-ақ, құтқарушылардың екі тобы бір мезетте бір-біріне қарсы жүретін болды. Бутаков шатқалынан шығатын топқа сүрлеу жол салу міндеті қойылды. Кейін, екі топ кездескен соң, сол сүрлеумен кейін оралатын болып шешілді.
«Қар көшкіні болуы мүмкін учаскелерді және қар үйінділері көп жиналған жерлерді айналып өту үшін осы тактика қолданылды. Сонымен, екі топ кеуделеріне дейін қар кешіп, еш жерге түнеместен тоқтаусыз жүріп отырды», — деп атап өтті құтқарушылар.
Құтқарушылардың көзге түрткісіз қараңғылықта (тұман және түнгі уақыт) бір-бірін GPS навигация арқылы бағдарлап отырғанын айта кеткен жөн.Ал байланысқа спутниктік терминалдар пайдаланылған.
Сөйтіп, Республикалық жедел-құтқару жасағының топтары осындай экстремалды қауіпті жағдайда жоғары деңгейде үйлесімді әрекет жасай отырып, операцияны ойдағыдай аяқтаған.