Ақышев БЖЗҚ қаражатының бір бөлігін өңдеу өнеркәсібіне қайта бөлуді ұсынып отыр

21 Июня 2016 1259

Алматы. 21 маусым. Ақпараттар орталығы. БЖЗҚ зейнетақы активтерінің бір бөлігі квазимемлекеттік компаниялардың сұранысына ие емес, осыған байланысты бұл қаражатты өңдеу өнеркәсібіне қайта бөлу қажет, деп санайды ҚР Ұлттық банкінің төрағасы Данияр Ақышев.

«2016 жылға арналған дағдарысқа қарсы шаралар жоспарын жүзеге асыру айқындағандай, БЖЗҚ зейнетақы активтерінің бір бөлігі квазимемлекеттік компанияларға керек емес, әңгіме 85 млрд теңге жөнінде болып отыр. Осыған байланысты Ұлттық банк бұл қаржыны өңдеу өнеркәсібін қаржыландыру мақсатына қайта бөлуді ұсынады», - деді Д.Ақышев бүгін үкімет отырысында.

Сонымен қатар, ол ҚР Ұлттық банкі Ұлттық қордың қаражаты мен БЖЗҚ активтерін бірлесіп пайдалануға қарсы емес екенін айтып өтті.

«Аталмыш тетік аясында қарызды төмендету үшін ставканы микширлеу керек болады. Бұл бір жағынан салымшының мүддесін қорғауға мүмкіндік береді.», - деп түсіндірді Ұлттық банк басшысы.

Оның айтуынша, БЖЗҚ қаржысын банктер арасында бөлу тетігі барынша ашық болды.

«Қаржыны бөлу тетігінде банктің бөлінген ресурсты игеру мен сақтау және зейнетақы активтерін қайтару әлеуеттері толықтай ескерілді. Бағдарламаға қатысушы банктер міндетті түрде ШОБ қарыздар қоржынына және сәйкес жұмыс тәжірибесіне ие болуы тиіс. Жалпы, банктерге 200 млрд теңге ұсынылды, алайда екі кезеңде 94,4 млрд теңге игерілді. Қаражаттың толық игерілмеген себебі ресустардың құнының жоғары болуы және олардың ШОБ қажеттіліктерін қаржыландыруға шартталғандығы болды. Банктер ұсынылған ресурстарға жеткілікті сұраныс білдірмегендіктен олар басқа бағыттар бойынша қайта бөліне алады», - деді Д. Ақышев.