Астана қаласының маңында Жеңіс Парадына қатысушыларға арналған далалық лагерь құрылуда

18 Марта 2015 996

Қазақстанның Қарулы Күштерінде Ұлы Отан соғысындағы Жеңістің 70 жылдық мерейтойына арналған әскери парадқа дайындық белсенді жүргізілуде, деп хабарлайды ҚР Қорғаныс министрлігі.

Парадқа жеке құрамнан 5000-нан астам адам, 220-дан аса әскери техника мен 85 ұшу аппараты қатысады. Мазмұндық құрылымына қарай парад тарихи және заманауи екі бөлімнен тұрады.

Тарихи бөлімде Ұлы Отан соғысы уақытындағы әскери техникалардың 36 үлгісі іске қосылады. Олардың ішінде саны 27 әскери техника және қару-жарақ: Т-34 танкі, ЗИС-2 зеңбіректі және М-30 гаубицалы ЗиЛ-157, танымал БМ-13 РС-30 «Катюша» және «Максим» пулеметі; сондай-ақ 9 ұшу құрылғысы бар — АН-2 және TL-2000.

Әскери парадтың тарихи бөлімінде механикаландырылған саптан өзге жаяу парадты әскердің қатысуы жоспарланған.

Тарихи парад төрт парадтық есепте көрсетіледі. Парадқа қатысушылар жалпы саны 24 парадтық есепті (қорап) құрайды, олардың екі тобы әскери қызметші қыз-келіншектерден тұрады. Бір парадтық есеп 154 адамнан құралады.

Әскери парадты Халық Қаһарманы, армия генералы Сағадат Нұрмағамбетов атындағы «Жас ұлан» Республикалық мектебінің тәрбиеленушілері бастап өтеді. Мектептің 80 тәрбиеленушісі парадтың тарихи және заманауи бөлігінде айтулы топтармен бірге адымдайды.

Қазіргі уақытта Астана қаласында парадқа қатысушыларға арналған далалық лагерь құрылуда. Оның аясында палаткалардан жасалған қалашықты орналастыру және аумақты дайындау жұмыстары жүргізілуде.

ҚМ хабарлауынша, қазір далалық лагерь аумағында асхана, жуынатын орын, тұрмыстық қамтамасыз ету бөлмесі, медпункт және казармалық қор жасақталған. Далалық лагерь электр қуатымен және жылумен қамтылып, бірлескен медициналық пункт және жылжымалы санитарлық-эпидемиологиялық зертханалар орналастырылған.