Біздің министрлер тіпті брифингтерде де журналистерден қашып жүреді

Біздің министрлер тіпті брифингтерде де журналистерден қашып жүреді – Назарбаев

05 Мая 2016 1336

Алматы. 5 мамыр. Ақпараттар орталығы. Қазақстан президенті Нұрсұлтан Назарбаев Ақордадағы кеңес барысында мемлекеттің бастамаларының мұқият түсіндірілуі маңызды екенін атап өтті.

Президент еліміздің экономикалық ынтымақтастық және даму ұйымының стандарттарына қарай жылжып, әлемдегі дамыған 30 мемлекеттің қатарына ұмтылып отырғанын айтты. Бұл елдерде тағы бір ең басты стандарт бар, ол – Үкіметтің және оның мүшелерінің қоғам үшін күнделікті ашықтығы.

«Онда министрлер барлық туындаған мәселелерге қатысты әрдайым шұғыл пікір білдіріп отырады. Ал бізде ше? Ақпараттық жұмыс тек журналистер алдына брифингке шығып, қағазда жазылғанды оқып беруден ғана тұрмайды. Біздің министрлер тіпті брифингтерде де журналистерден қашқақтап, қарапайым сауалдарға жауап бермейді», - деді Н. Назарбаев.

Ол қазіргі кезде министрліктерді қандайда бір саладағы саясатты айқындайтын органдарға айналдырғанымызға тоқталды.

«Саясаткер жұртпен тілдесуге, өз ұстанымын түсіндіруге, қоғамның сеніміне ие болуға тиіс. Халықпен, ең алдымен жаңа заңдарды қолданатын жұртпен кездесу керек», - деді Қазақстан президенті.
Еске салсақ, Қазақстан Президенті Жер кодексінің қоғамдық резонанс тудырған бірқатар нормаларына 2017 жылға дейін тоқтау салды.

Бұған дейін республиканың бірқатар өңірлерінде азаматтар рұқсат етілмеген митингіге шығып, қазақстандық ауыл шаруашылық жерлерінің шетелдіктерге жалға берілуіне немесе сатылуына наразылықтарын білдірген болатын.

«Қабылданған заңның тетіктері мен нормалары жұртшылықты кеңінен қатыстыру арқылы талқыланбады. Сондықтан көп жағдайда халықтың алаңдауы дұрыс. Егер қазақстандықтар қабылданған шешімге сенбейтін болса, демек бұл дұрыс емес деген сөз», - деді мемлекет басшысы.

Жер кодексінегі түзетулердің мәнін халыққа дұрыс түсіндіре алмағандары үшін республиканың ұлттық экономика министрі Ерболат Досаев пен оның орынбасары Қайырбек Өскенбаев отставкаға кетті. Президент өз тарапынан жаңа түзетулерді «егжей-тегжейлі» қарауды тапсырды.

«Бұл мәселені егжей-тегжейлі қарастыру керек. Егер талқылаудан кейін Парламент ортақ шешімге келетін болса, мораторий алып тасталады, ал егер олай болмаса, күшінде қалады. Біз халыққа ұнамайтын заңға зәру емеспіз. Бұл ретте мораторий сақталған жағдайда ауыл шаруашылығының жағдайы нашарлауы мүмкіндігін түсіндіру қажет», - деді Н. Назарбаев.

Сондай-ақ Үкімет жанынан Премьер-министрдің бірінші орынбасары Б.Сағынтаевтың басшылығымен комиссия құруды тапсырды.

«Комиссия барлық мүдделі органдарды және қоғамдық бірлестіктерді тартуы тиіс. . Резонанс тудырған ережені кеңінен талқылап, ортақ ұстаным әзірлеп, Парламентке беру керек», - деді мемлекет басшысы.
Мемлекет басшысы «Нұр Отан» партиясына демократиялық күштер коалициясы аясында кең ауқымды түсіндіру жұмыстарын жүргізуді тапсырды.

«Бұған барлық партиялар, қоғамдық бірлестіктер және бұқаралық ақпарат құралдары қатысуы тиіс. Түсіндіру жұмыстарына Үкімет пен Парламенттің қос палатасының депутаттары белсене қатысады деп үміттенемін, - деді Н. Назарбаев.