Еуразиялық экономикалық одақтан біз ешқандай «ғажайыптар» күтпейміз

Еуразиялық экономикалық одақтан біз ешқандай «ғажайыптар» күтпейміз - Путин

31 Мая 2016 2150 Еуразиялықэкономикалықодақ, Путин, Назарбаев

Алматы. 31 мамыр. Ақпараттар орталығы. Ресей президенті Владимир Путин Қазақстан президенті Нұрсұлтан Назарбаевпен кездесуде «Еуразиялық экономикалық одақтан ешқандай «ғажайыптар» күтпейтінін» айтты.

«Еуразиялық экономикалық одақтан біз ешқандай «ғажайыптар» күтпейміз, бірақ интеграциялық өзара іс-қимыл бізге қазіргі қиындықтарды жеңуге көмегін тигізеді», - деді В. Путин.

Ол Қазақстанның жақын серіктес және ең сенімді одақтас екенін айтты.

«Арамызда берік экономикалық қарым-қатынас орныққан. Бұған дейінгі жылдарда Қазақстан экономикасы жақсы қарқын алып, оның дамуының іргелі негізі қаланды. Осының барлығы қазіргі қиындықтарды еңсеруге мүмкіндік береді», - деп санайды Ресей президенті.

Өз кезегінде Қазақстан президенті Ресейдің ең жақын көршіміз, экономикалық және саяси тұрғыдан одақтасымыз әрі серіктесіміз екенін, солай болып қала беретінін атап өтті.

«Біздің бірлесе жүргізген жұмыстарымыздың арқасында ТМД өмір сүріп келеді, Еуразиялық экономикалық одақ құрылды. Күрделі халықаралық жағдайларға қарамастан, ол бүгінде қызметін жалғастыруда. Мәскеуде өткен Жеңіс күні мерекесіне шақырғаныңыз үшін тағы да ризашылығымды білдіремін. Биыл үлкен мерекелер бар – ТМД-ның құрылуының 25 жылдығы, сондай-ақ ЕАЭО-ға мүше мемлекеттер тәуелсіздігінің мерейтойлары, Ресей күні», - деді мемлекет басшысы.

Жалпы, оның айтуынша, біздің алдымызда ШЫҰ, ТМД мемлекеттері басшылары кеңесі, Қазақстан мен Ресей өңіраралық ынтымақтастық форумы, сондай-ақ Петербург халықаралық экономикалық форумы аясында тығыз кездесулер кестесі тұр.

«Осындай кездесулердің көптігі біздің елдеріміз арасындағы қарым-қатынастың өзара сенімді сипаты бар екенін білдіреді. Талқылаулар арқылы біз кез келген мәселені шешіп келеміз, бұл ынтымақтастығымызды одан әрі дамытуға септігін тигізеді», - деді Н. Назарбаев