Кәрімов Назарбаевтың Өзбекстанға сапаран «маңызды» деп атады

15 Апреля 2016 1806 Кәрімов, Назарбаев, Қазақстан, Өзбекстан

Алматы. 15 сәуір. Ақпараттар орталығы. Қазақстан Президенті Нұрсұлтан Назарбаев Өзбекстан Президенті Ислам Кәрімовпен кездесті, деп хабарлады Ақорданың баспасөз қызметі.

Хабарланғандай, мемлекеттер басшылары сауда-экономика, су-энергетика, көлік-логистика және мәдени-гуманитарлық салалардағы екіжақты ынтымақтастықтың негізгі бағыттарын қарастырды.

Бұдан басқа, Н.Назарбаев пен И.Кәрімов күн тәртібіндегі өзекті халықаралық мәселелерді, сондай-ақ өңірлік қауіпсіздікті қамтамасыз етуге, Ташкентте өткізу жоспарланып отырған Шанхай ынтымақтастық ұйымының (ШЫҰ) саммитіне қатысты жайттарды талқылады.

Қазақстан Президенті екі елдің арасындағы тарихи достық қатынастарға тоқталып өтті.

«Біз бұл байланыстарды Тәуелсіздік жылдары сақтап қана қоймай, мемлекеттерімізді жақындастыра түстік. Бұл орайда, көрші ретіндегі біздің риясыз ниетпен кездесу тәжірибеміздің маңызы зор. Мен Сізбен достығымды, қазақ пен өзбек халқының достығын мақтан тұтамын. Мақсат – осы қарым-қатынастарды, өзара сенімді нығайтып, келесі ұрпаққа мирас етіп қалдыру. Барша қазақстандықтар атынан өзбек халқына табыс пен бақ-береке тілеймін», – деді Н. Назарбаев.

Өз кезегінде И.Кәрімов екі мемлекет арасында шынайы достық қарым-қатынас, құрмет пен өзара тілеулестік бар екенін айтты.

«Біз өмір сүріп жатқан қазіргідей күрделі кезеңде дәл осы қасиеттер қажет. Нұрсұлтан Назарбаевтың бұл сапары қазіргі жағдайда дұрыс шешімді бірлесіп іздеу жолында пікір алмасу үшін де маңызды. Әлемдік экономикада дағдарыс жалғасуда, дүние жүзінің ешбір мемлекеті қиындықтан кенде емес. Біз дұрыс жолмен жүріп, әрдайым бағытымызды бірлесе байыптап отыруды қалаймыз», – деді И.Кәрімов.