Қазақстан Вьетнамға бірқатар тауарларды баж салығынсыз экспорттай алады

11 Февраля 2016 1746 Вьетнам, Сауда, Экспорт, Қазақстан

Алматы. 11 ақпан. Ақпараттар орталығы. Қазақстан Вьетнамға бірқатар тауарларды нөлдік мөлшерлеме бойынша экспорттай алады, деп хабарлады ҚР ұлттық экономика министрінің бірінші орынбасары Марат Құсаинов, делінген үкімет басшысының баспасөз қызметіндегі хабарда.

«Келісімге қол қою кедергілерді жояды, яғни біз нөлдік мөлшерлеме бойынша Вьетнамда сұранысқа ие тауарларды сол жаққа экспорттай аламыз», — деді М.Құсаинов Сенаттағы «Еуразиялық экономикалық одақ пен оған мүше мемлекеттер және Вьетнам Социалистiк Республикасы арасындағы еркiн сауда туралы келiсiмдi ратификациялау туралы» заң жобасының таныстырылымында.
Бірінші кезекте, оның айтуынша, әңгіме астық, ұн, қара металл жөнінде.
Вице-министрдің айтуынша, бүгінгі таңда екі ел арасындағы тауар айналымы 200 млн долларды құрайды, оның ішінде импорт 190 млн доллар. Бұл ретте Қазақстан Вьетнамға тек қорғасын және асбест, ал Вьетнамнан біздің нарыққа ұялы телефондар, компьютерлер, спорт киімі мен аяқ киім жеткізіледі.
«Келiсiмнiң нормаларына сәйкес, ЕАЭО елдерi мен Вьетнам арасында тауарлардың басым бөлiгiне баж салығынсыз сауда режимi белгiленiп, кейбiр тауарлар бойынша өзара саудадағы импорттық кедендiк баждарды алып тастау бойынша өтпелi кезең белгiлендi», — деп түсіндірді ведомство басшысының орынбасары.
Сонымен қатар, оның айтуынша, сезiмтал тауарлардың бiр бөлiгi еркiн сауда режимiнен алынып, бұл тауарларға қатысты тараптардың импорттық тарифiне сәйкес баж салығы қолданылатын болады.
Сонымен қатар, ішкі нарықты қорғау мақсатында Келісім арқылы ДСҰ нормаларына сәйкес арнайы қорғаныс, антидемпингтік және өтемақылық шараларды қолдану құқығы қарастырылған.
Сондай-ақ, өтпелі кезең барысында келісімді жүзеге асырудан ЕАЭО нарығына қауіп төнген жағдайда қосымша қорғаныс құралы ретінде екіжақты қорғаныс шаралары қолданылуы мүмкін.
Құжат арқылы ЕАЭО Бірыңғай кедендік тарифі деңгейінде кедендік баж салығы түрінде триггерлік қорғаныс механизмін қолдану қарастырылған. Ол Вьетнамнан импорттың шекті жылдық көлемі көтерілгенде ЕАЭО үшін сезімтал тоқыма тауарлары мен жиһазды қорғауға арналады.
«Келісім экспорттық кедендiк баж салығын алып тастауды көздемейдi. Олар басқа үшiншi елдерге экспорттау кезiнде қолданылатын неғұрлым қолайлы режим мөлшерлемелерi бойынша алынады», — деді вице-министр.