Қазақстандық фермерлер бір гектар жерден орта есеппен 400 доллардың өнімін алады

06 Мая 2016 1999 Қазақстан, фермерлер, өнім

Алматы. 6 мамыр. Ақпараттар орталығы. Қазақстандық фермерлер бір гектар жерден орта есеппен 400 доллардың өнімін алады, - деп мәлімдеді Қазақстан президенті Нұрсұлтан Назарбаев Ақордадағы кеңес барысында.

Мемлекет басшысы елдің ауыл шаруашылығы саласында 2 миллион 300 мың адам жұмыспен қамтылғанын айтты.

«Сөйте тұра бұл салада еңбек өнімділігі төмен деңгейде қалып отыр. Отандық фермерлер бір гектар жерден орта есеппен 400 доллардың өнімін алады. Дәл осы көрсеткіш АҚШ-та 1,5 мың долларды, Германияда – 2800, Францияда 3200 долларды құрайды. Ауыл шаруашылығы жаңа техникаға, жаңа технологияларға, суғару жүйелеріне инвестиция салуға мұқтаж», - деді Н. Назарбаев.

Ол атап өткендей, әлемдік тәжірибеде ауыл шаруашылығына салынған қаражат өзін ақтау үшін 10-15 жыл керек. Қазақстанда ауыл шаруашылығы мақсатындағы жерлерді 10 жылға, соның ішінде шетелдіктердің жалға алуы туралы заң ұзақ уақыттан бері қолданылып келеді.

«Алайда бұл салаға әлі айтарлықтай инвестиция келген жоқ. Шетелдіктер 65 мың гектарда ғана жұмыс істеп жатыр, яғни жалға алынған жердің 0,06 пайызы ғана. Жерді ұзақ мерзімге жалға беру – бүкіл дүние жүзі бойынша инвестиция тартудың амалы», - деді президент.

Оның айтуынша, Бельгия, Германия, Грекия, Нидерланд сияқты елдер шетелдік инвесторлардың жерді меншікке немесе жалға алуы мәселесіне қандай да бір шектеу қоймайды. Францияда шетелдік инвесторлар үшін жер ресурстарын жалға алудың ең ұзақ мерзімі 99 жылды құрайды.

«Жер кодексі нормаларын әзірлеу барысында бұл тәжірибелер ескерілді. Бірақ жерді шетел азаматтарына сату мәселесі болған емес, қазір де жоқ», - деді Қазақстан басшысы

Еске салсақ, Қазақстан Президенті Жер кодексінің қоғамдық резонанс тудырған бірқатар нормаларына 2017 жылға дейін тоқтау салды.

Бұған дейін республиканың бірқатар өңірлерінде азаматтар рұқсат етілмеген митингіге шығып, қазақстандық ауыл шаруашылық жерлерінің шетелдіктерге жалға берілуіне немесе сатылуына наразылықтарын білдірген болатын.