Түркімендік авиация техниктері қазақстандық зауытта оқудан өтеді

11 Февраля 2016 1705 Авиация, Оқыту, Техниктер

Алматы. 11 ақпан. Ақпараттар орталығы. 2015 жыл бойына созылған қазақстандық және түркімендік тараптар арасындағы келіссөздердің қорытындысы бойынша Түркіменстанның ІІМ авиациялық техниктерінің Қазақстандағы зауыттарда оқуы туралы келісім шартқа қол қойылды, деп хабарлады «KAZNEXINVEST» АҚ баспасөз қызметінен.
Хабарда айтылғандай, келісім шарттың жалпы сомасы 100 млн теңгеден асады.
«Қазір біз Түркіменстанда ЕС145 тік ұшақтарына қызмет көрсету бойынша мәселені талқылап жатырмыз. Сонымен қатар, отандық тік ұшақтарды жеткізуді кеңейту және қызмет көрсету мен оқыту бойынша қызмет көрсету үшін ағымдағы жылы KAZNEX INVEST-тің Қырғызстанға, Тәжікстанға, Беларуське, Әзірбайжанға, Монғолия елдеріне жоспарланған көшпелі шараларына қатысуды ойлап отырмыз», — деді «Еурокоптер Қазақстан инжиниринг» ЖШС коммерциялық департаментінің басшысы Тимур Тилинин.
Баспасөз қызметінде еске алғандай, 2015 жылдың 29 наурызы мен 1 сәуірі аралығында «KAZNEXINVEST» АҚ Түркіменстанда «Еурокоптер Қазақстан инжиниринг» ЖШС компаниясының таныстырылымын ұйымдастырды, таныстырылым барысында Түркіменстанның Қорғаныс министрлігінің, Төтенше жағдайлар министрлігінің және Ішкі істер министрлігінің өкілдерімен кездесу өткізді.
Келіссөздер барысында түркімендік тарап ЕС145 маркілі 3 тік ұшаққа сервистік қызмет көрсету, авиациялық техника мен ұшқыштарды оқыту қажеттігін тілге тиек етті. ЕС145 тік ұшағын жинау бойынша қазақстандық зауыт өз кезегінде өзінің Ұшқыштар мен техникалық құрамды оқытатын орталығын таныстырды.
Орталықтың «Қазақстан мен Орталық Азияның өңірлік қажеттіліктері үшін құрылған және орыс тілінде ЕС145 тік ұшағының техниктерін, ұшқыштарын оқытатын жалғыз орталық болып табылатыны» айтылған.