Ұлыбритания мен АҚШ әскерилері Қазбриг пен Қазбат штабтарын оқытады

10 Марта 2015 1176

Биыл сәуір айында «Дала қыраны-2015» халықаралық тактикалық-арнайы бітімгершілік оқу-жаттығуының бірінші кезеңі басталады. Бірінші кезең барысында рота деңгейіндегі операциялар және шешім қабылдау әскери процесі пысықталады, деп хабарлайды ҚР Қорғаныс министрлігі.

Аталмыш оқу-жаттығу «Іле» оқыту орталығы базасында, атап айтқанда тактикалық операциялар орталығында, алдыңғы шептегі операциялар базасында, қалалық жағдайлар мен ауылдық елді-мекендерге арналған оқыту орындарында өтеді.

«Дала қыраны-2015» оқу-жаттығуы екі кезеңде өтеді. І кезең барысында Ұлыбритания Қарулы Күштерінің өкілдері жаяу әскер ротасы деңгейінде тактикалық жаттығулар өткізеді. Ал АҚШ Қарулы Күштері бригада мен батальон штабтарын мамандандыру және оқу-жаттығудың ІІ кезеңіне даярлау бойынша іс-шаралар жүргізеді.

Британдық нұсқаушылар тобы І кезең барысында Қазбатты ауылдық және қалалық елді-мекенді, қоғамдық тәртіпті күзету, жиналған қалың топ пен тәртіпсіздікті қадағалау, база қауіпсіздігін қамтамасыз ету, айдауылдау операциялары және т.б. роталық міндеттерге үйретеді.

50-ші АРЦЕНТ нұсқаушыларының әскери тобы (Аризона Ұлттық Ұланы) Қазбат штабының әскери қызметшілерін шешім қабылдау әскери процесіне, ротаны басқару және тактикалық байланыс пункттерін жетілдіру, жарылғыш заттармен жұмыс істеу, зардап шеккендерді әуе және жер үсті жолдарымен эвакуациялауға үйретеді.

«Дала қыраны» оқу-жаттығуы «Қазбригтың» бейбітшілікті қолдау операциялары барысында жедел үйлесімділігіне қол жеткізуге бағытталғанын айта кеткен жөн. Оқу-жаттығу бітімгерлік бригадасының көпұлтты күштер құрамында бірлескен басшылық жетекшілігімен міндеттерді орындауға икем-қабілеттілігін шынайы тексереді.

Аталмыш оқу-жаттығу 2003 жылдан бастап өткізіліп келеді. Жыл сайын оқу-жаттығуға 1 500 астам адам жұмылдырылып, шетел мемлекеттерінің әскери бақылаушылары, НАТО түрлі штабтарының сарапшылары, Қазақстан Республикасында тіркелген әскери-дипломатиялық корпус өкілдері шақырылады, деп хабарлайды Қорғаныс министрлігі.