EXPO 2017-ге ШҚО-да «Шабыт аумағы» жобасы әзірленбек

09 Февраля 2016 1465 EXPO-2017, ШығысҚазақстан

Алматы. 9 ақпан. Ақпараттар орталығы. 2017 жылы Астанада өтетін EXPO 2017-ге Шығыс Қазақстан облысында (ШҚО) «Шабыт аумағы» жобасын әзірлеуді ұсынуда, деп хабарлады ШҚО ақпараттар орталығынан.

Хабарда айтылғандай, «Алтын Алтай – өңірді дамыту байлығы» жобасы аясында Шығыс Қазақстанда «Шабыт аумағы» жобасын әзірлеуді ұсынуда. Ол EXPO 2017 қонақтарын тарту үшін ғажайып табиғат бұрыштарын жасауды білдіреді.
«Қазақстан алдында EXPO 2017-ге дайындықтың үлкен міндеті тұр. Бізге қонақтарды қызықтыратын туристік өнімдерді қалыптастыру керек. «Алтын Алтай – өңірді дамыту байлығы» жобасы өзін туризмді дамытудың тиімді құралы ретінде көрсете алады. Оның аясында қысқа мерзім ішінде біз шығармашылық адамдарын тарта отырып, «Шабыт аумағы» жобасын әзірлеуді ұсынып отырмыз», — деді жоба үйлестірушісі Светлана Белова «ШҚО-дағы ауылдық және экологиялық туризм; мүмкіндіктері мен дамыту болашағы» конференциясы барысында.
Оның айтуынша, «Шабыт аумағы» жобасы «Көшпенділер» лэнд-арт симпозиумына ұқсас болады. Ол «Берель» мұражай-қорығының алаңында Қазақстанның, Ресейдің, Қырғызстанның, Белоруссияның, Словакияның суретшілері мен мүсіншілерінің басын біріктірмек.
Қазіргі таңда елдің әр өңіріне туристік бағыттарды қалыптастыру бойынша жұмыстар жүргізілуде. «Алтын Алтай — өңірді дамту байлығы» жобасының жетекшілері олардың бірінің қазақстандық Алтайда пайда болатынына сенімді. Жоба командасы ШҚО әкімдігі және басқа әріптестерімен бірге «Алтын Алтай» деп аталатын гранд-тур әзірлеуге дайын.
«Алдымызда ең қызықты және ең қиын кезең тұр. Ол өңірлерді дамыту бағдарламасын жүзеге асырудың қорытынды кезеңі. Қазақстанда ол 2012 жылдан бері жүзеге асырылып келеді. Еуропалық одақ жоба нәтижесінің тұрақтылығына назар аударады. Олардың өміршеңдігі мен әрі қарай дамуы маңызды», — деп атап өтті Қазақстандағы Еуропалық Одақ Өкілдігінен жоба менеджері Әлия Байдабекова.