Алматы облысы 100 млн астам халықты азық-түлікпен қамтамасыз ете алады

Алматы облысы 100 млн астам халықты азық-түлікпен қамтамасыз ете алады – Баталов

10 Июня 2016 2106 Алматыоблысы, азық-түлік, қамтамасызету

Алматы. 10 маусым. Ақпараттар орталығы. Алматы облысының әкімі Амандық Баталов өңірдің тиімді географиялық жағдайы заманауи технологияларды қолдану арқылы 100 млн астам халықты азық-түлікпен қамтамасыз етуге мүмкіндік береді, деп санайды.

«Соңғы жылдары біз бизнес тарапынан Алматы облысына деген қызығушылықтың артқанын байқап отырмыз. Сонымен 2015 жылы инвестиция көлемі бойынша (490 млрд теңге) облыс 2014 жылғы деңгейді 105,3% физикалық көлем индексімен 37 млрд теңгеге арттырып, республика бойынша 4-ші айқындамаға шықты», - деді А. Баталов «Жетісу Инвест – 2016» халықаралық инвестициялық форумы барысында.

Жалпы, өткен жылы жалпы сомасы 34,7 млрд теңгеге 170 инвестициялық жоба жүзеге асырылып, 3,6 мың жаңа жұмыс орындары құрылды. Әкім хабарлағандай, ағымдағы жылы 94 млрд теңгеге 115 жобаны жүзеге асыру жоспарланған, ол 4,4 мың адамды жұмысқа орналастыруға мүмкіндік береді.

«Барлығы 2016-2020 жылдар аралығында 2 трлн теңгеден астам сомаға 443 жоба жүзеге асырылады деп күтіп отырмыз, нәтижесінде 23 мыңдай жұмыс орны құрылады», - деді Алматы облысының басшысы.

Ол Алматы облысының тиімді географиялық жағдайы заманауи технологияларды пайдалану арқылы 100 млн астам халықты азық-түлікпен қамтуға мүмкіндік беретінін атап өтті.

Өңір басшысы атап өткендей, облыстың табиғи-климаттық факторлары мен аграрлық-индустриалды бағытын ескере келе, ауыл шаруашылық өндірісін қарқынды ету мен оның өнімдерін тереңінен қайта өңдеуді арттыру инвестицияның негізгі бағыттары болып табылады.

«Жүгері өндірісінде, сүт-тауарлы фермасы мен қайта өңдеуші кәсіпорындарды құруда, туризм саласында, әлеуметтік нысандар құрылысында (атап айтсақ мемлекеттік-жеке әріптестік негізінде балабақша ашу), сондай-ақ жел және күн электр стансаларында өсім болашағы бар », - деп баса айтты А. Баталов.

Әкімнің баспасөз қызметінде мәлімдегендей, форум қорытындысы бойынша Алматы мен Жамбыл областары әкімдіктерінің арасында ынтымақтастық туралы меморандум жасалды, сонымен қатар жалпы сомасы 1,2 млрд АҚШ долларынан астам сомаға түрлі салаларда қызметтерді жүзеге асыратын компаниялармен бірқатар меморандум жасалды.