Арыста өз қызын зорлап келген көпбалалы әке 20 жылға сотталды

11 Декабря 2020 1470 Право

Фото:ҚазАқпарат

Алматы. 11 желтоқсан. Ақпараттар орталығы - Түркістан облысында тергеушілер педофил әкенің кінәсін толық дәлелдеді. Сот оны 20 жылға бас бостандығынан айырды, деп хабарлайды ҚазАқпарат облыстық полиция департаментіне сілтеме жасап.

«Тергеушілердің өндірісінде әрқилы істер кездеседі. Кейде оларды зерттей отырып, жәбірленушілердің де, күдіктілердің де тағдыры қайғылы болатынын түсінесің, әсіресе ата - аналарының өз балалары қылмыстың құрбаны болған кезде» дейді Түркістан облысы ПД тергеу басқармасының бастығы, полиция полковнигі Нұрмахан Жалғасов.

Осы жылдың басында Арыс АПБ-ға жергілікті тұрғын арыз берген. Әйел өзінің үлкен қызының телефонында кездейсоқ күйеуінің жіберген хабарламаларын тауып алғанын айтты. Оның жіберген мәтіндерінің мазмұны күдік тудырған. Содан соң қызымен ашық сөйлесіп, нәтижесінде күйеуінің өз қызын зорлап жүргенін түсінген. Әйелдің арызы бірден ҚР ҚК 120-бабы бойынша тіркелді. Тергеушілер тергеуді бастап кетті.

«Сотқа дейінгі тергеу барысында бұл отбасының ешқандай есепте тұрмайтын, қарапайым жанұя екенін анықтадық. Отағасы Ресейде вахталық әдіспен, ал анасы Арыс қаласында жұмыс істейді екен. Көпбалалы отбасында бес бала тәрбиеленуде. Ең үлкен қызы педофил әкенің құрбаны болып отыр. Біз барлық тергеу әрекетін жан-жақты зерделеп жүргіздік. Іске қатысты әр нәрсені назардан қалдырмауға тырыстық. Оған қоса жәбірленушінің әкесі де кінәсін мойындамады. Әңгімелескен сайын істегенін жоққа шығарып, айтқанынан қайтпады. Қызым барлығын ойынан шығарып отыр деп бізді адастыруға тырысты» дейді полиция полковнигі.

Сондықтан барлық дәлелдерді жинауға тура келді. Сотқа дейінгі тергеп-тексеруге үш айдан астам уақыт жұмсалған. Осы уақыт ішінде бірқатар сараптамалар тағайындалды. Қыздың әкесінің кінәсін дәлелдеу үшін айғақтар жиналды. Нәтижесінде алты томдық қылмыстық іс қозғалды. Әр том 180 беттен тұрды. Осылайша жазда іс толығымен аяқталып, айыптау актісімен бірге сотқа жіберілді.

«Сот істі қарап, өз үкімін шығарды. Өз қызын зорлаған қатыгез әке 20 жылға бас бостандығынан айырылды» деп атап өтті тергеу басқармасының бастығы Нұрмахан Жалғасов.

Источник: ҚазАқпарат

читайте также