Аукционда сатылмаған ауыл шаруашылығы жерлері жарты бағасына сатылып кетуі мүмкін

20 Апреля 2016 1919 ауылшаруашылығыжерлері, Аукцион, сату

Алматы. 20 сәуір. Ақпараттар орталығы.Егер екі аукционның қорытындылары бойынша учаске сатылмаса, онда ол учаскенің бағасын кадастрлық құнының белгіленген ең төменгі шегіне - кадастрлық құнының 50% дейін төмендету көзделген, деп хабарлады ҚР ҰЭМ Құрылыс, тұрғын үй-коммуналдық шаруашылық істері және жер ресурстарын басқару комитеті төрағасының орынбасары Бауыржан Смағұлов.

«Егер екі аукционның қорытындылары бойынша учаске сатылмаса, онда ол учаскенің бағасын кадастрлық құнының белгіленген ең төменгі шегіне - кадастрлық құнының 50% дейін төмендетуді көздейтін аукционға қойылатын болады. Екінші кезеңде жалға берілген жер учаскелерін сатып алу бойынша жеңілдік шарттарын ұсыну қарастырылады. Жалға алушылар жалдау мерзімі аяқталғанға дейін 10 жылға дейін бөліп төлеу арқылы, олардың кадастрлық құнының 50 % мөлшерінде айқындалатын жеңiлдiк бағамен жеке меншікке сатып алу құқығына ие болады», - деді Б. Смағұлов Астанадағы брифингте.

Ол еске салып өткендей, жерлердің нарық айналымындағы белсенділігін ынталандыру және жер қорының толыққанды экономикалық қайтарымын жоғарылату мақсатында Қазақстан Республикасының «Жер кодексіне өзгерістер мен толықтырулар енгізу туралы» 2015 жылғы 2 қарашадағы Заңына өзгерістер енгізілді.

Аталмыш өзгерістерге сай мемлекеттің меншігіндегі ауыл шаруашылық мақсатындағы жер учаскелері ҚР жеке және заңды тұлғаларына ауыл шаруашылығы мақсатындағы жер учаскелері жеке меншік құқығымен аукцион арқылы беріледі.

Сонымен қатар, жалға алынған ауыл шаруашылығы мақсатындағы жерлерді пайдалану бойынша шектеулер алынып тасталды. Жерді пайдаланушыларға жалға алу құқығымен құқықтық мәмілелер жасасуға мүмкіндік берілді.

«Енді ауыл шаруашылығы мақсатында құрылыс жүргізілетін болса мақсатты пайдалану бойынша өзгерістер енгізу қажет емес. Бұл шаралардың барлығы әкімшілік кедергілерді алып тастауға мүмкіндік береді. Осы ретте 10-40 жылға ұзақмерзімді жалға берліген жерлер одан әрі жалға беріле беруі мүмкін және меншік иесі оны қалаған жағдайда жеңілдетілген бағамен сатып алса болады», - деп түсіндірді шенеунік.

Ведомство өкілі хабарлағандай, бүгінде Қазақстанда ауыл шаруашылығы мақсатында шамамен 97,4 млн гектр жер ұзақмерзімді жалға берілген және жердің 1,2% ғана жекеменшік иелігінде.