Баспана құны әлеуметтік сипатта болуға тиіс

Баспана құны әлеуметтік сипатта болуға тиіс – Назарбаев

11 Февраля 2016 1954 БаспанаҚұны, Назарбаев, НұрлыЖол

Алматы. 11 ақпан. Ақпараттар орталығы. Мемлекеттік бағдарлама бойынша тұрғызылып жатқан баспана құны әлеуметтік сипатта болуға тиіс, деді Қазақстан президенті Нұрсұлтан Назарбаев үкіметтің кеңейтілген отырысында, деп хабарлады Ақорда баспасөз қызметінен.

Президент саланың одан әрі дамуына қолдау жасау үшін «Нұрлы жол» бағдарламасын 2017 жылы жүзеге асыруға жоспарланған қаражатты 2016 жылға ауыстыру есебінен 360 миллиард теңге бөлу жөнінде тапсырма берілгенін айтты.
Хабарда түсіндірілгендей, осы қаражаттың 53 миллиард теңгесі «Бәйтерек» холдингі желісі арқылы жалға берілетін тұрғын үй құрылысын жалғастыруға, 149 миллиард теңгесі несиелік тұрғын үй құрылысына, соның ішінде 22 миллиард теңге салымшыларды жергілікті атқарушы органдар мен Тұрғын үй құрылыс жинақ банкі арқылы несиелеуге бағытталады.
Сонымен қатар, жекеменшік құрылыс компанияларын қолдау үшін «Самұрық-Қазына» АҚ арқылы қайтарымды негізде 97 миллиард теңге бөлінеді. Бұл ретте құрылысшыларға қойылатын талаптар бірлесіп қаржыландыруды, жері мен жобалық-сметалық құжаттарының, жүзеге асыру ісінің бекітілген бағасының болуын қамтуы тиіс екендігі атап өтілді.
Хабарда айтылғандай, мемлекет басшысы жаппай тұрғын үй салынатын жаңа аудандарға инфрақұрылым тарту үшін әкімдіктер арқылы 61 миллиард теңге бөлінетінін айтты.
«Бұл жұмыстардың жауапкершілігі осы қызмет жүргізілетін өңірдің әкімдеріне тікелей жүктеледі. Баспана құны әлеуметтік сипатта болуға тиіс екендігіне айрықша назар аударғым келеді», — деді Н. Назарбаев.
Қазақстан Президенті бұл шаралар 2016 жылы қосымша 1,5 миллион шаршы метр тұрғын үйді пайдалануға беруге және ІЖӨ өсіміне үлес қосуға мүмкіндік беретінін айтты.