«Батыс Еуропа-Батыс Қытай» автомобиль жолы шағын бизнесті «қоректендіруі» керек

02 Февраля 2016 1810 АқтөбеОблысы, Сапарбаев, ШағынБизнес

Алматы. 2 ақпан. Ақпараттар орталығы. Ақтөбе облысының әкімі Бердібек Сапарбаев Хромтау ауданының басшысына «Батыс Еуропа-Батыс Қытай» халықаралық автомобиль жолының бөлігін шағын және орта бизнесті дамытуда барынша қолдануды тапсырды, деп хабарлады әкімнің баспасөз қызметінен.

«Жақсы аудан, орналасқан жері де қолайлы. Күн сайын Хромтау арқылы 8-10 мың автокөлік құралы өтеді. Осындай көлік ағыны есебінен шағын бизнесті, жол үсті сервисін дамытуға болады. Бұл мәселеде, менің пікірімше, басқа өңірлермен өзара тығыз байланыста болу керек», — деді Б.Сапарбаев тұрғындар алдындағы Хромтау ауданы әкімінің есептік кездесуі барысында.
Хабарда айтылғандай, облыс әкімі аудан басшылығына Хромтау ауданының аумағы бойынша өтіп жатқан «Батыс Еуропа-Батыс Қытай» халықаралық автомобиль жолының бөлігін барынша қолдануды тапсырды.
«Толық қуатқа шығу үшн жергілікті өндірушілерге қолдан келген көмекті аямау керек. өндірушілер мен сауда нүктелері көп болған сайын бәсекелестік те соншалықты артып, өнім бағасы арзандайды», — деп атап өтті өңір басшысы.
Баспасөз қызметінің ақпарынша, Хромтау ауданында қазір 42 мың адам тұрып жатыр, оның ішінде 25 мың адам – Хромтау қаласында.
Аудан әкімі Аязбай Ұсманғалиевтің айтуынша, 2015 жылдың қорытындысы бойынша өнеркәсіп өндірісінің көлемі 189 млрд 278,2 млн теңгені құрады, физикалық көлем индексі — 101 пайыз.
Ол «Ақтөбе мыс компаниясы» ЖШС ауданда жылына қуаты 500 мың тонна мыс-мырыш кенін құрайтын «Весенне-Аралчинское» кенішінің құрылысын жүргізіп жатыр. «БВР» ЖШС қуаты жылына 5 мың тонна жарылғыш заттар өндірісі бойынша зауытты пайдалануға берді, «Игданит» ЖШС өндірістік қуаты жылына 25 мың тонна сөндірілмеген әк өндіру зауытын іске қосты. Жалпы есептік кезеңде ауданда 31 млрд теңгеден астам инвестиция игерілген.
«Тұрғындар өзіндік өндірістегі өніммен қамтамасыз етілген: ет, сүт, ұн, жұмыртқа. Аудан тұрғындарын ауыл шаруашылық өнімдерімен қамтамасыз ету, бағаны тұрақтандыру мақсатында 2015 жылы Хромтауда 50 ауыл шаруашылық жәрмеңкесі өтті, оларда жалпы сомасы 262,9 млн теңге болатын 136 тонна ет, 500 тонна қышқыл сүт өнімдері, көкөніс, жұмыртқа, ұн сатылды», — деп атап өтті өз сөзінде А. Ұсманғалиев.