Жеңіс Қасымбек: «Жошы хан» тарихи-мәдени кешенінің құрылысы 90% аяқталды

28 Мая 2021 1181 Культура

Фото:saryarqanews.kz

Алматы. 28 мамыр. Ақпараттар орталығы - Қарағанды облысының Ұлытау ауданында туризмді дамытуға ғана емес, сонымен қатар жергілікті тұрғындардың өмір сүру сапасын арттыруға да ерекше көңіл бөлініп отыр. Бұл туралы өзінің Facebook парақшасында Қарағанды облысының әкімі Жеңіс Қасымбек жазды, деп хабарлайды ҚазАқпарат.

«Ұлытауға сапар барысында фермерлермен кездесіп, субсидия мәселесін талқыладық. Бірқатар мәселелерді Ауыл шаруашылығы министрлігі деңгейінде шешу қажет. Алдағы күндері тағы да Қарағандыда кездесуге уағдаластық. Аудан орталығында төрт көппәтерлі тұрғын үйдің құрылыс алаңдарында болдым. Құрылыс жеке инвестициялар есебінен жүргізілуде. Тұрғын үйлер сатып алу құқығымен жалға берілетін болады. Сондай-ақ аудандық орталық аурухана үшін жаңа ғимаратты салу жоспарлануда. Қазір дәрігерлер бейімделген бұрынғы балабақша ғимаратында жұмыс істеп жатыр. Нысанның құрылысына жер телімі бөлініп, ЖСҚ әзірленіп, мемлекеттік сараптама қорытындысы алынды. «Ауыл – ел бесігі» бағдарламасы бойынша жобаны қаржыландыру мәселесі шешілетін болады. Өздеріңіз білетіндей, облыста ауылдық жерлерде 32 фельдшерлік-акушерлік пунктті салу жоспарланған. Оның алтауы Ұлытау ауданының ауылдарында ашылады. Сондай-ақ, туристік әлеуетті дамыту үшін ҚР мәдениет, туризм және спорт министрлігі салған Сапар орталығына бардым. Нысанда асхана, мәжіліс залы, қонақ үй орналасқан. Жалпы, орталық бір уақытта 200 адамды қабылдай алады. Сонымен қатар, «Жошы хан» тарихи-мәдени кешенінің құрылыс алаңында болдық. Мұндағы жұмыстар 90% орындалды. Қазіргі уақытта ішкі әрлеу, ауланы абаттандыру, көгалдандыру және инженерлік сыртқы желілерді қосу бойынша жұмыстар жүргізілуде. Құрылыс жұмыстары тамызда аяқталады»,-дейді облыс әкімі. Кешен Алтын Орда дәуірін зерттеуге арналған ғылыми орталық қана емес, сонымен қатар Ұлытаудың киелі орындарын, этно-ауыл, Жезқазған қаласының тарихи-археологиялық және тарихи-өндірістік мұражайларын байланыстыратын бірегей туристік маршруттың бір бөлігіне айналады. «Қарсақбай кентінде агротехникалық колледжді жөндеу жұмыстарының сапасын тексеріп, Жұмыспен қамту-2021 жол картасы бойынша салынып жатқан 100 орындық Дене шынықтыру – сауықтыру кешенінің құрылыс алаңында болдым. Күзге қарай спорт кешенін пайдалануға беруді тапсырдым»,-деп жазды Жеңіс Қасымбек.

Источник: ҚазАқпарат

читайте также