Елеусінов жетістігін Тәуелсіздік құрметіне арнайды

15 Декабря 2021 10682 Социум

Фото:Vesti.kz

Алматы. 15 желтоқсан Ақпараттар орталығы - Қазақстан әлемде спорттық державалардың бірі. Тәуелсіздіктің 30 жылында қатысқан Жазғы Олимпиадалардың ешбірінен олжасыз оралмадық. Әсіресе қазақтың оң жамбасына келетін спорт түрлерінен Қазақстанның бәсі қашанда биік тұратын.

– Қазақстан – Тәуелсіз ел, кең байтақ жері бар, бейбітсүйгіш халқы бар, өзінің рәміздерімен мақтана алып, паш етуге мүмкіндігі бар. Біз спортшылар әлемдік ареналарда көк туымызды желбіретіп, Ән ұранымызды шырқату үшін барымызды саламыз. Бұл әрбір бүлдіршіннің арманы. Менің де арманым болған. Рио Олимпиадасында мен арманыма жеттіп, алтын медаль иегері атандым, – дейді боксшы Данияр Елеусінов.

Бірнеше халықаралық жарыстардың жеңімпазы Данияр Елеусінов бүгінде кәсіпқой бокста бағын сынап жүр. Біздің жерлесіміз кәсіби рингте ешкімге есе жібермеді. 10 кездесу өткізіп, барлығында айқын басымдықпен жеңіске жетті. Тәуелсіздіктің 30 жылдығына орай ұйымдастырғалы тұрған сайыста Данияр аргентиналық боксшымен жұдырықтасады.

– Бұл жекпе-жегімді елімнің Тәуелсіздігіне арнаймын. Жанкүйерлердің қолдауы мен үшін маңызды. Жеңіске бірге жетеміз деп үміттенемін.

Қазақстан дүние жүзінде өтіп жатқан сайыстарға қатысып қана қоймай, өз жерінде де дүбірлі додалар өткізіп тұрады. Мәселен 2011 жылы сол кездегі Астана мен Алматыда өткен қысқы Азиа ойындарында жалпыкомандалық есепте бірінші орын алды. Ал 2017 жылы Алматыда қысқы универсиада алауы тұтанды. Сондай-ақ түрлі спорт түрлерінен Әлем чемпионаттары, гран-при турнирлері өткізіліп тұрады.

Қазақстан халқының 30 пайызға жуығы бұқаралық спортпен айналысып тұрады. Бүгінде еліміздің ірі қалаларында жалпыхалықтық марафон өткізу дәстүрге айналды.