Кезекте тұрған 10 мың елордалық отбасы баспаналы болады

15 Декабря 2021 11480 Социум

Алматы. 15 желтоқсан Ақпараттар орталығы - Қазақстанда Тәуелсіздік алар тұста 17 миллионға жуық халық тұрды. Алғашқы жылдары елдегі қиыншылықтың кесірінен ел басқа елдерге үдере көшті. Осылайша демография ақсаңдап, елдің жағдайы тұралап қалды. Алайда көп ұзамай Қазақстанның экономикасы нығайып, тұрғындардың әлеуметтік жағдайы жақсара бастаған соң қазақстандықтардың қатары арта бастады.

2009 жылы өткен халық санағында Қазақстанда 16 миллионнан аса адам мекендейтіні белгілі болды. Бұл тұрғыда азаматтардың саны артқан сайын тұрғын үйге деген сұраныс та еселене түсті. 2017 жылы миллион мәртебесін алған Нұр-Сұлтанда да халық саны ай санып артып отырды. Тиісінше баспанаға деген сұраныс шарықтады.

Бұл тұрғыда елорда кәдімгі қолжетімді баспана салудың қарқынын арттырды. 2019 жылы 1 млн 700 мың шаршы метр тұрғын үй салынған болса, 2020 жылы 3 млн шаршы метрді құрады. Ал биыл 3 млн 200 мың шаршы метр салынбақ. Осы жылы кезекте тұрған 10 мың отбасыны пәтермен қамту көзделіп отыр. 300-ден астам отбасы тұратын 20 апатты және ескі үйлердің тұрғындары қауіпсіз, жаңа баспанаға көшіріледі.

2018 жылы Қазақстан Республикасының Тұңғыш Президенті – Елбасы Нұрсұлтан Назарбаев тұрғын үй құрылысына зор серпін беріп отырған «Нұрлы жер» бағдарламасын табысты іске асырып отырғанын айтқан болатын.

«Тұрғын үй ипотекасының қолжетімділігін арттыратын жаңа ауқымдағы «7-20-25» бағдарламасы қолға алынды. Әкімдерге жергілікті бюджет есебінен жеңілдетілген ипотека бойынша алғашқы жарнаны ішінара субсидиялау мәселесін пысықтауды тапсырамын. Мұндай тұрғын үй сертификаттарын беру біліктілігі жоғары педагогтер, медицина қызметкерлері, полицейлер және өңірге қажетті басқа да мамандар үшін ипотеканың қол жетімділігін арттырады. Сондай-ақ халықтың әлеуметтік тұрғыдан әлсіз топтары үшін ірі қалаларда жалдамалы тұрғын үй құрылысын ұлғайту қажет. Бұл шаралар 250 мыңнан астам отбасы үшін тұрғын үй жағдайын жақсартуға мүмкіндік береді. Бюджет есебінен салынатын жаппай құрылыс алаңдарына арналған инженерлік инфрақұрылым жүргізуді қоса алғанда, мемлекет бес жыл ішінде 650 мың отбасыға немесе 2 миллионнан астам азаматтарымызға қолдау көрсетеді» – деді Нұрсұлтан Назарбаев