Қазақстанда бір мыңнан астам мемлекеттік қызметкер сынақтан өтуде

08 Июня 2016 2064 Қазақстан, мемлекеттікқызметкер

Алматы. 8 маусым. Ақпараттар орталығы. Ағымдағы жылдың 1 маусымындағы жағдай бойынша бір мыңнан астам мемлекеттік қызметкер сынақтан өтуде, деп мәлім етті ҚР мемлекеттік қызмет істері жөніндегі министр Талғат Донаков, деп хабарлады премьер-министрдің сайтынан.

«Мемлекеттік қызметтің жаңа моделі аясында мемлекеттік қызметке алғаш қабылданғандар үшін сынақ мерзімінің жаңа жүйесі жұмыс жасай бастады. Ағымдағы жылдың 1 маусымына жағдай бойынша еліміздің барлық мемлекеттік органдарында сынақ мерзімі аясында бір мыңнан астам мемлекеттік қызметкер сынақтан өтуде», - деді Т. Донаков тұрғындармен есепті кездесу барысында.

Оның айтуынша, биыл мемқызметке түсу барысындағы конкурстық рәсім өзгертіледі.

«Алдағы болашақта конкурстық рәсімдерді оңтайландыру бағытында қолданыстағы заңнама түзетілетін болады. Біріншіден, мемлекеттік емес құрылымда жұмыс жасайтын адамдар қатыса алу үшін екінші ішкі конкурс өткізбестен бірінші конкурстан кейін-ақ бірден қорытынды шығару мүмкіндігі ұсынылады», - деп атап өтті министр.

Қажет болған жағдайда екінші ішкі конкурс жекелеген меморгандарда өткізілуі мүмкін.

«Егер мемлекеттік орган конкурстың екінші кезеңін өткізу керек деп санаса, оны өз таңдауы бойынша өткізе алады. Мен ағымдағы жылы бұл мәселені шешеміз деп ойлаймын», - деп түсіндірді Т. Донаков.

Хабарда айтылғандай, "100 нақты қадам» Ұлт жоспарының 4 қадамын жүзеге асыру аясында 3+3 формуласы: үш айдан кейін және алты айдан кейін сәйкестікті межелік бақылау бойынша мемлекеттік қызметке алғаш тұрғандар үшін міндетті сынақ мерзімі қарастырылғанын айта кеткен жөн.