Қазақстанда БҰҰ-ның Азық-түлік және ауыл шаруашылығы ұйымының кеңсесі ашылды

28 Апреля 2016 2470 FAO, азық-түлік, қауіпсізк

Алматы. 28 сәуір. Ақпараттар орталығы. Қазақстанда БҰҰ-ның Азық-түлік және ауыл шаруашылығы ұйымының (FAO) кеңсесі өз жұмысын бастады, деп хабарлады ҚР Ауыл шаруашылығы министрлігінің баспасөз қызметі.

«Елімізде FAO өкілділігінің ашылуы бұл Қазақстанның азық-түлік қауіпсіздігін қамтамасыз ету бойынша халықаралық координациялауға дайындығының көрсеткіші. Қазақстан үшін басым бағыттарының бірі – офис арқылы FAO-мен және оның құрамына кіретін елдермен жедел жұмыс істеу және тығыз ынтымақтастық орнату мүмкіндігі», - делінген хабарламада.

Салтанатты ашылу рәсіміне Бас директордың орынбасары, Еуропа мен Орталық Азиядағы FAO-ның аймақтық өкілі В.О. Рахманин және Қазақстан Республикасы Ауыл шаруашылығы Вице-министрі Г. Исаева қатысты.

FAO-ның байланыс және серіктестік жөніндегі бюросының ашылу жөніндегі келісім-шартқа ҚР Үкіметімен FAO арасында 2015 жылдың 23 мамыр айында қол қойылды.

«Бүгінде Қазақстан алдында ауыл шаруашылығы саласын дамыту бойынша ауқымды міндеттерге орай FAO-мен ұсынылатын техникалық және кеңестік қолдау, ақпараттық ресурстарды қолдану мүмкіндігі үлкен маңызға ие», - деп аталып өткен хабарламада.

Қазақстанда құрылған FAO-ның кеңсесі құрылғалы отырған Азық-түлік қауіпсіздігі жөніндегі ислам ұйымымен (АҚИҰ) тығыз ынтымақтастықта болады деп жоспарлануда.

Сонымен қатар, министрлікте 2015 жылдың соңында Қазақстанда «Органикалық өнім өндіру туралы» заң қабылданғаны аталып өтті. Ол органикалық өнім өндірісінің дамуы үшін жағдай жасап, органикалық өнімнің экспортын ұлғайтуға мүмкіндік береді.

БҰҰ-ның Азық-түлік және ауыл шаруашылығы ұйымы (FAO)БҰҰ-ның жүйесіне кіреді және халықаралық азық-түлік қауіпсіздігі мен ауыл шаруашылығын дамыту мәселелерімен айналысады.

FAO азық-түлік және ауыл шаруашылығына қатысты ақпаратты жинайды, саралайды және таратады. Сондай-ақ, ұйым мүше-мемлекеттерге техникалық көмек көрсету қызметімен айналысады. Қазіргі таңда FAO-ның құрамына 197 мемлекет кіреді.