Қазатомөнеркәсіп өндірістің өзіндік құнын 16,4 млрд теңгеге қысқартты

17 Февраля 2016 1411 Уран, Қазатомөнеркәсіп, Өндіріс

Алматы. 17 ақпан. Ақпараттар орталығы. Өндіріс тиімділігін арттыру, технологиялық үдерістерді оңтайландыру және қуат үнемдеу бойынша қабылданған кешенді іс-шаралар нәтижесінде Компания өндірістің өзіндік құнын 16,4 млрд теңгеге қысқарта білді, деп хабарлады «Қазатомөнеркәсіп» ҰАК» АҚ баспасөз қызметінен.

Хабарда айтылғандай, 2015 жылы қабылданған шаралар қорытындысы бойынша Қазатомөнеркәсіптің экономикалық қосымша құны (EVA) 15,4 млрд теңгеге өсті.
Сонымен қатар, 2015 жыл қорытындысы бойынша 23800 тонна уран өндірген Қазақстан ірі табиғи уран өндіруші ретіндегі әлемдегі көшбасшылық орнын сақтап қалды. Сондай-ақ еліміз АҚШ пен Франция нарығындағы ірі уран жеткізіп берушіге айналды..
Хабарда айтылғандай, компания қызметінің басқа да маңызды нәтижелерінің қатарында жылу бөлгіш құрамалар (ЖБҚ) шығаратын зауытты жобалау және салу туралы қытайлық CGNPC компаниясымен желтоқсанда қол қойылған келісімді, еншілес 10 кәсіпорын кеңселерінің уран өндіруші аймақтарға қоныс аударуын, сондай-ақ еншілес кәсіпорындар санының 82-ден 72-ге кемігенін айтуға болады.
«Компанияда сондай-ақ, инвестициялық қызметтің тиімділігін арттыруға бағытталған жаңа инвестициялық саясат әзірленіп, қызметкерлерді конкурстық іріктеу мен ПҚК бойынша тиімділікті бағалау жүйесі енгізілді», — делінген хабарда.
Қазатомөнеркәсіптің негізгі қызметін дамытуға, уран өнімдерін өткізу нарығын кеңейтуге және өндірісті әртараптандыруға айрықша назар аударылмақ. Компания қалған екі еншілес кәсіпорынды да уран өндірілетін өңірге көшіруді, споттық нарықта өнім саудасымен шұғылданатын трейдинг компаниясын құруды, Қытай, АҚШ және Ресейдегі Қазатомөнеркәсіп өкілдіктерін таратуды, сондай-ақ бейінді емес 18 кәсіпорынды Холдинг құрамынан шығарып, «ҮМЗ» АҚ базасында ЖБҚ шығаратын зауыт құрылысының техника-экономикалық негіздемесін әзірлеуді аяқтауды көздеп отыр.
Сонымен қатар трансформациялау бағдарламасын іске асыру шеңберінде Қазатомөнеркәсіп үдерісті орталықтандыру және оның ашықтығын қамтамасыз ету жолымен қаржы үнемдеуге мүмкіндік беретін сатып алулардың жаңа үлгісін іске қосу, уәждеу және қызметкерлердің жұмысқа қабілеттерін арттыру мақсатында олардың еңбек тиімділігін бағалау мен грейдтеуге негізделген еңбекке ақы төлеу жүйесін енгізуді жоспарлаған.