Қазгеология үш ирандық инвестициялық компаниямен келісім жасасты

11 Апреля 2016 1898 Қазгеология, иран, инвестиция

Алматы. 11 сәуір. Ақпараттар орталығы. Бүгін ҚР Инвестииялар және даму министрлігінің ведомствоға бағынысты ұйымдары ирандық компаниялармен бірқатар инвестициялық келісім жасасты, деп хабарлады министрліктің баспасөз қызметі.

Хабарланғандай, ҚР ИДМ «Қазгеология» Ұлттық геологиялық барлау компаниясы» АҚ үш ирандық инвестициялық компаниямен «Ghadir Industry & Mine Development International Co», «Sadr Tamin Investment Co» және «SUNIR» (Iran Power & Water Equipment and Services Export Company) ынтымақтастық туралы келісімге қол қойды.

Тараптар әлеуетті жер қойнауы учаскелерінде қатты пайдалы қазбаларды барлау, оларды бағалау, Қазақстанның пайдалы қазбаларды барлау жұмыстарына инвестиция тарту салаларында бірлескен жобаларды жүзеге асыруды көздеп отыр. Геологиялық барлау саласына жалпы көлемі 30 млн доллар деңгейінде инвестициялар жоспарланған.

Түсіндіріліп кеткендей, «Ghadir Industry & Mine Development International Co» холдингінде негізгі 8 бағыт бойынша бөлімдер бар, олардың қатарында тау-кен өндірісі, құрылыс пен мұнай.

«Компанияның жекеменшік болат құю зауыты, алюминий зауыты, ірі темір кенорны бар. Компания ірі темір, полиметалл мен мыс кенорындарына қызығушылық танытып отыр», - делінген министрліктің хабарламасында.

SHASTA компаниялар тобына кіретін «Sadr Tamin Investment Co» елдегі бірінші минералды өнімдер холдингісі болып табылады. Компанияның жарғылық капиталы 2,5 млрд доллар шамасында. 5 жылда, яғни 2012-2016 жылдар аралығында жоспарланған инвестициялар көлемі 2,6 млрд. доллар деңгейінде. Қомақты қаражат минералды шикізат, темір, алтын, мыс сынды металлдарға бағытталған.

«SUNIR» холдингі (Iran Power & Water Equipment and Services Export Company) энерегетика, су, мұнай, газ, тау-кен, мұнайхимиясы мен құрылыс саласындағы ирандық жетекші компания болып табылады.

Компания қызметі ТМД нарығынан бастап Оңтүстік Азия, Таяу Шығыс, африкалық құрлық пен Латын Америка нарығына дейін жайылған. 2013 жылы компания 250 хаылқаралық жетекші компаниялардың ішінен ENR рейтингісінде 191 орынға жайғасты.

Бұған дейін хабарланғандай, «SUNIR» холдингісімен Қазақстанда үш электрстанцияны салу туралы келісімге қол жеткізілген.