ҚР ислам елдерінде азық-түлік қауіпсіздігін қамтамасыз ететін ұйымды басқарады

06 Апреля 2016 1817 азық-түлікқауіпсіздігі, исламмемлекеттері

Алматы. 6 сәуір. Ақпараттар орталығы. Қазақстан ислам мемлекеттерінде азық түлік қауіпсіздігін қамтамасыз ететін ұйымының құрылуына бастамашылық етті, деп хабарлады ҚР Ауыл шаруашылығы министрлігі.

Хабарланғандай, 2016 жылдың 28 сәуірінде Астана қ. Азық-түлік қауіпсіздігі және ауыл шаруашылығын дамыту жөніндегі Ислам ынтымақтастығы ұйымы (ИЫҰ) министрлері конференциясының 7-сессиясы болып өтеді. Конференция шеңберінде Азық-түлік қауіпсіздігі жөніндегі ислам ұйымы (АҚИҰ) Бас Ассамблеясының құрылтайшы сессиясы өткізіледі. Құрылғалы отырған ұйым Астана қ. орналаспақ. Алғашқы үш жыл бойы ұйымға Қазақстан төрағалық ететін болады.

Жоспарланып отырғандай, АҚИҰ жұмысы мүше мемлекеттерге ауыл шаруашылығын, ауылдық жерлерді, азық-түлік қауіпсіздігін және биотехнологияны тиімді дамыту аясында әртүрлі аспектіде техникалық ноу-хау және тәжірибе беріп, сондай-ақ тұрақты әлеуметтік байланысты қамтамасыз ету, топырақтың сорлануы, орман алқаптарының азаюы және шөл-шөлейт мәселелеріне қатысты сұрақтарды шешуге бағытталмақ.

Бұдан басқа, ұйым азық-түлік қауіпсіздігінің резервін құру арқылы мүше мемлекеттерге қажетті жедел және ізгілікті көмекті анықтау әрі ұсыну мақсатында азық-түлік қауіпсіздік саласында бағалау және мониторинг жүргізуді жоспарлап отыр. Мұнымен бірге, сәйкесінше технологиялармен алмасу арқылы ортақ ауыл шаруашылығы принциптерін координациялап, жүзеге асыруды жоспарлауда.

Министрліктің мәліметі бойынша, ҚР-да ауылшаруашылық жайылым жерінің көлемі 200 млн. астам гектарды құрайды. 2015 жылы ауыл шаруашылығының ішкі жалпы көлемі 4,4%-ға ұлғайып, 2,7 трлн. теңгені құрады. Соңғы 5 жыл ішінде ауыл шаруашылық өнімінің экспорты 1,3% есеге көбейіп, 2015 жылдың қорытындысы бойынша 1,1 млрд. АҚШ долларға жетті.

АҚИҰ-ға мүшелік ететінін Ауғанстан, Бенин, Буркина-Фасо, Гамбия, Гвинея, Гвинея-Биссау, Джибути, Египет, Иран, Қазақстан, Ливия, Мавритания, Мали, Нигер, Біріккен Араб Әмірліктері, Палестина, Сауд Арабиясы, Судан, Сомали, Комор аралдары одағы, Сьерра-Леоне, Суринаме, Түркия, Уганда растады.

Аталып өткендей, Азық-түлік қауіпсіздігі жөніндегі ислам ұйымын құру бастамасын 2011 жылы Ислам ынтымақтастығы ұйымы Сыртқы істер министрлері кеңесінің 38-сессиясында ҚР Президенті Нұрсұлтан Назарбаев көтерген болатын. Екі жылдан кейін ИЫҰ мүше мемлекетінің 30 сарапшысы Астана қ. өткен үкіметаралық эксперттік отырыста жарғылық құжаттың жобасын келісті. Бүгінде құрылғалы отырған ұйымның жарғысын ИЫҰ мүше 24 мемлекеті бекітіп, қол қойды. 1995 жылы Қазақстан ИЫҰ-ның толық құқықты мүшесі болды.