Қызылорда полицейлері автобусты неліктен өз денелерімен тоқтатқандарын айтты

08 Февраля 2016 1383 Автобус, Полицейлер, Қызылорда

Алматы. 8 ақпан. Ақпараттар орталығы. Қызылорда облысы ішкі істер департаментінде полицейлердің неліктен автобусты өз денелерімен тоқтатқандарын айтты.

ІІД баспасөз қызметі хабарлағандай, облыстық департамент «Youtube» видеохостингінде 6 ақпан күні жарық көрген видеоны тексерген. Аталмыш факті 2016 жылдың 11 қаңтарында сағат шамамен 17.50-де Қызылорда қаласында орын алған. Белгілі болғандай, Қызылорда қ. ІІБ жол-патрульдік батальонының №695 автоэкипажы қызмет барысында м/н N 176 BRA 11 бағыттық автобус жүргізушісінің жол қозғалысы ережесін бұзғанын, яғни бағдаршамның жүруге болмайтын белгісінде қозғалғанын байқаған.
Хабарда айтылғандай, «полиция қызметкерлері әкімшілік құқық бұзушылық туралы хаттама толтыру үшін автобус жүргізушісіне тоқтау туралы белгі берген».
«Алайда автобус жүргізушісі полиция қызметкерлерінің талабына мойынсұнбай, жүрісін жалғастыра берген. Аталмыш көлік құралының артынан ерген автоэкипаж автобус тоқтаған кезде оған оны тоқтатуларының себебін түсіндіріп, құжаттарын көрсетуін талап еткен», — делінген хабарда.
Сонымен қатар, адамдардың өмірі мен денсаулығына қауіп төндірген автобус жүргізушісінің оқиға орнынан қашып кеткісі келгені де айтылған. Сол мезет полиция қызметкерлері жолды жауып, полиция қызметкерлерінің заңды әрекеттеріне қарсылық танытқан автобус жүргізушісін кабинадан алып шыққан.
«Құқық бұзушылыққа жол бергені үшін автобус жүргізушісіне қатысты 599 бабы 1 бөліміне (бағдаршамның тыйым салынған белгісіне жүру) сәйкес әкімшілік хаттама толтырылды. Сонымен қатар, автобус жүргізушісіне қатысты ҚР ҚК 379 бабы 1 бөлімі бойынша билік өкілдерінің заңды талабына бағынбау фактісі бойынша сотқа дейінгі тергеу жүргізілуде», — деп атап өтті баспасөз қызметінен.