Сапарбаев компанияларды ЭКСПО нысандарының құрылысына қатысуға шақырды

05 Февраля 2016 2186 Сапарбаев, СНПС, ЭКСПО

Алматы. 5 ақпан. Ақпараттар орталығы. Бастысы – жұмыс орындарын сақтау, жалақыларын уақытылы төлеу, ұжымдық шартты орындау, деді Ақтөбе облысының әкімі Бердібек Сапарбаев «СНПС-Ақтөбе көлік компаниясы» ЖШС басшылығымен кездесуде, деп хабарлады әкімнің баспасөз қызметінен.

Арнайы жиналыста «СНПС-АКК» ЖШС бас директоры Хуан Юншын мәлімдегендей былтыр орындалған жұмыстар көлемі 2014 жылмен салыстырғанда 16%-ға қысқарды.
«Көрсеткіштердің төмендеуі еңбек ұжымына әсерін тигізді, атап айтсақ, компанияның 1500 қызметкерінің 413-і толық емес жұмыс уақытына көшті, 19 адам жалақыларының 50% сақталатын демалысқа кетті, тағы 394 қызметкер жалақылары сақталмайтын демалыста», — деді ол.
Қазіргі таңда кәсіпорын автопаркінде өңірдің жер қойнауын пайдаланушыларына көлік қызметін көрсететін 880 мыңнан астам арнайы техника бар. Соған байланысты облыс әкімі кәсіпорын басшысына тек мұнай компаниясына сеніп отыра бермей, көлік тасымалы, жол құрылысы, ЭКСПО-2017 құрылысы секілді қызмет салаларына да белсенді қатысу керектігін айтты.
«Егер сізге «Астана ЭКСПО-2017» ҰК» АҚ жұмысына көмек керек болса, біз Ақтөбе облысы әкімдігі мен ұлттық компания басшылығы арасында бұған дейін жасалған меморандум аясында қолдау көрсетеміз. 2016 жылы Қарғалы ауданында цемент зауытының құрылысы басталады, онда да сіздің компанияңыз жұмыс жасайды. Сіздің кәсіпорынның материалдық базасы жақсы, және соны барынша қолдануымыз керек», — деді Б. Сапарбаев.
Ол компания басшылығына кәсіпорынның ұжымдық шартына әлеуметтік бағытты арттыру, сондай-ақ компанияның жұмыстары мен қызметтерінде қазақстандық мазмұнды арттыру бойынша мүмкіндіктер қарастыруды тапсырды.
Х. Юншын мұнайдың әлемдік бағасының төмендеуімен байланысты кейбір қиыншылықтарға қарамастан кәсіпорын қызметкерлерінің жалақылары уақытылы төленетінін, ұжымдық шарт талаптарының толық көлемде орындалып жатқанын атап өтті. Ағымдағы жылы қысқарту күтілмейді.
«Осындай кездесу «Шығыс мұнай және сервистік қызмет көрсету» ЖШС-да өтті, ол жерде де үш жақты келісімге қол қойылды», — деп хабарлады баспасөз қызметінен.