Тілсіз жау

25 Ноября 2020 1337 Происшествие

Фото:КазТрансГаз Аймак

Алматы. 25 қараша. Ақпараттар орталығы - 23 қараша күні Түркістан облысы Сайрам ауданының Ақбұлақ ауылында тұншықтырғыш газбен уланған 17 жастағы бойжеткен көз жұмды, деп хабарлайды «КазТрансГаз Аймак».

Қайғылы жағдайдан кейін оқиға орнына шақырылған газ компаниясының қызметкерлері тексеру кезінде газ құрылғыларын орнату талаптары өрескел бұзылғанын анықтады. Жуынатын бөлмеде газ су жылытқышы орнатылған, мұржасы түтін тартпайды.

Мұндай оқиғалар оңтүстік өңірде, әсіресе суық түскен кезде жиі қайталанып тұрады.

Жыл басынан бері Шымкентте газдың ауаға тарауынан 9 төтенше жағдай болып, 10 адам көз жұмды. Ал еліміз бойынша тұншықтырғыш газбен уланудың 28 дерегі тіркеліп, 36 адам қайтыс болды.

Адам өлімімімен аяқталатын оқиғалар көп жағдайда газ құрылғыларын, оның ішінде газ су жылытқыштарын заңсыз орнатқаннан болады.

Газ су жылытқышының артықшылықтары бар, әрине. Бұл әсіресе жаз бойы ыстық сусыз отыратын шағын аудандардың тұрғындарына тиімді. Алайда мұндай газ су жылытқыштарының зияны да көп:

- жарылыс және өрт қауіптілігі;

- оған бөлек мұржа қажет және үнемі желдетіп тұру керек;

- түтін тарту күші өте жақсы болуы керек, олай болмаған жағдайда уланып қалу қаупі жоғары;

- судың және газдың қысымы тиісті деңгейде болуы шарт.

Газ плитасы сияқты жабдықтар орнатылған кейбір үйлерде (11 қабаттан жоғары) мұндай газ су жылытқыштарын қоюға рұқсат берілмеуі мүмкін.

Ал жуынатын бөлмеде газ су жылытқыштарын орнатуға мүлдем тыйым салынған, оларды орнатуға ешбір бақылаушы орган рұқсат бермейді, себебі бұл тұрғындар үшін аса қауіпті.

Осы қарапайым ережелерді бұлжытпай орындау керек. Өзіңіздің және жақындарыңыздың өміріне жауапкершілікпен қараңыз!